九鐵呢期都算屋漏兼逢連夜雨，呢頭被評級機構惠譽質疑財政實力，將評級展望降至負面；嗰頭又唔等政府點頭，就自把自為公布話明年拎四個地盤出嚟招標，即時辣㷫政府。房屋及規劃地政局前晚漏夜發聲明，話只係收到九鐵嘅建議，暗示未同意九鐵「去馬」。
衰咗就要認錯，即使噚日係端陽佳節，九鐵都立即發新聞稿，強調「就有關西鐵及馬鞍山鐵路上蓋物業發展項目推出的時間表，九鐵已將有關建議提交政府，現仍在進行協調階段，並有待政府審批」，新聞稿的「口徑」終於調校到同政府一致。
九鐵重話，一直支持政府嘅目標及配合其計劃，但就跌落地執番揸沙，話相信有關招標項目應該唔會對物業市場帶來負面影響。其實九鐵就算幾等錢使，都要識得睇吓老細眉頭眼額嘅。
傳真︰2623-9278
電郵︰