香港近年吹起纖體修身的風氣，周街周巷都係美容減肥中心，小初真係諗唔到呢行競爭咁激烈，但修身堂（8200）全年盈利竟然有成2742.6萬元，比去年勁升8倍有多，修身堂業績靚爆鏡，除咗派末期息1仙外，重有0.8仙特別股息派送。
小初記得，年初修身堂曾經炒過一轉，最高見過0.70元，兼且得到金手指垂青，揸咗8%咁多，其後大市回落，修身堂股價亦下跌，一度跌穿0.40元，莫非係金手指沽貨所致？但經紀陳就話冇咁嘅事。
經紀陳重話，今次修身堂公布業績咁靚，幕後人或會借機炒番轉，只可惜係家陣市況不利二三線股，尤其是修身堂重屬創業板股。
修身堂周一升2.2%，收0.46元，但成交就相當奀豬，只得26萬股，金額只得11.9萬元。
另外，上周股價暴跌9成後停牌，成為全城話題嘅遠東生物制藥（399），年輕賓架話，聽講有人為咗安撫一眾賓架，力言久未現身嘅老闆就快蒲頭。
慕容小初