張衞健同三位靚女官恩娜、蔣怡同有線新知台主播吳天瑜早排喺數碼港拍攝政府嘅「技能提升計劃影視娛樂課程」宣傳片，目的係呼籲娛樂圈人士進修。健仔今次好有心，唔只一口答應兼唔收錢，重自掏腰包出埋機票錢，專程喺北京飛返香港拍片。
不過馮仁昭聽聞政府最初係想搵齊無綫、亞視同有線三間電視台，各自提供一啲由藝人所拍嘅片段，再剪輯播出。亞視同有線就一早話咗冇問題，反而無綫就諸多推搪，最後重以版權為由推咗，所以政府就只好重新諗過條橋，改為搵健仔同靚女們合作。
今次健仔拍嘅片有唔少電腦效果，所以幾位演員都成日同空氣做對手戲，不過健仔就大讚幾位靚女醒目，好多鏡頭都係一take過。而健仔話宣傳片可以帶嚟正面訊息，佢眼見有啲做娛樂圈嘅人轉咗去揸的士同剪頭髮，不過佢哋對娛圈重有興趣，有咗呢個課程，就可以令人有機會重返呢行，而宣傳片明日就會首播。
台灣天后李玟同尊龍早前合演咗電影《自娛自樂》，噚日內地有網上消息指呢部戲有機會參加威尼斯影展，不過未必一定會得獎。馮仁昭覺得李玟嘅英文講得咁流利，佢代表齣戲去影展，一定就唔會好似上次章子怡喺康城咁失威，講嚟講去都係嗰幾句英文啦。
薛家燕同胡楓日前出席一個卡拉OK大賽，參加者年齡由四歲至八十歲都有，重大跳勁舞。家燕姐話：「有啲人嘅舞姿重好似孔慶翔㖭，真係可以培育吓啲人一夜成名，不過我八月都會同孔慶翔合作拍電影，我哋合作冇年齡界限嘅，希望今次可以打入國際巿場。」
Sony新人藍奕邦噚日喺尖沙嘴搞咗個小型音樂會，佢重帶埋小師妹鄧穎芝出嚟撐場。而藍奕邦噚日喺現場自彈自唱時都相當感觸，佢話因為三年前自己都喺呢度唱過歌，但當時冇人識，𠵱家有機會出碟，又喺番呢度表演，難怪佢會百般滋味在心頭！
彭家麗早排俾賊人搶去手提電話，重被扑至頭破血流。噚日佢出席奧海城一個活動時，表示已經康復九成，佢話：「之後再做咗一次磁力共振，醫生話應該冇事，但就唔知有冇後遺症，不過我最近睇番電話簿，有啲人我唔記得咗係邊個！」馮仁昭希望佢呢個情況只係暫時性啦！
周杰倫喺日本拍攝緊新片《頭文字D》，忙於苦練賽車。噚日係端午節，周杰倫陪唔到媽咪過節，亦冇機會食到媽咪親手包嘅糭。雖然周杰倫冇口福，但佢唱片公司一班同事就好有口福，因為周杰倫媽咪包咗一袋糭送去佢唱片公司畀員工分享，認真有心！
