排通宵都要買！<br>HTM鱷魚皮Force1行貨平一半

久久未有新動作的HTM，這個月終於有所行動，先推出鱷魚皮AirForce1，令到一度陷於低潮的Force1起死回生。由於全球只限量3,012對，兼且加上日本潮神藤原浩個「朵」，水貨到港即時作價$3,000，仍然有大量信徒接貨，大熱Size更告斷貨。藤原信徒唔使擔心，皆因行貨HTM今個月將會到港，而且開價只係$1,299，平水貨一半有多，但黑白兩色只有各40對，本月28號正式出街前，一眾信徒又唔知要提早幾多通宵瞓街喇！

記者：李崗華　攝影：陳智良

今次售賣HTM嘅地方並非NikeShop，而係DoublePark旗下嘅Exit。除咗有鞋賣之外，更有歷代HTM嘅展覽，一次過展出所有HTM鞋款，儼如一個HTM小型展覽，此外，以後嘅HTM鞋款都將會於Exit有售，而售價方面亦以行貨價發售。即係話，以後各位信徒唔使捱貴水貨（買到嘅話）！

HTM點解咁矜貴？
在2002年，藤原浩與兩名美國設計師：AirJordan系列的設計師TinkerHatfield及NikeLaserProject的主腦MarkParker，組成一隊以他們英文名字頭而命名的夢幻組合，名為HTM。Nike進行了一個實驗性的合作計劃，就藉着這個試探性質的計劃，6對至今仍是炒賣目標的波鞋就此誕生：AirForce1Low、WovenBoot、AirWoven、PrestoRoam、ACGTerraHumara及ACGMocBoot。HTM用最高級的質料製成，例如AF1及TerraHumara就選用了只有Nike的Lux系列能媲美的高質皮革，而Woven更是由人手一針一線縫製而成。此外，系列的獨特包裝也是HTM賣點之一，特大的鞋盒，假若將整個系列也收藏起來，可以將它們堆起變成一個大鞋櫃，而抽屜式的包裝方便收藏及拿出穿着。此包裝只在倫敦、日本及巴黎有售。

HTM展覽！歷代逐對睇
買完鞋（排唔到都好啦），不妨睇埋歷代HTM嘅展覽先走，皆因一次過要睇晒咁多對HTM並非易事，之前要睇，相信只可以睇㗎仔雜誌，𠵱家就免費一次過畀你睇晒。就算買唔到鞋都算攞番個安慰獎。展覽日期：即日起至本月28日

彩虹化身
HTMAirWoven
當年Woven大熱，藤原就以七彩Woven作HTM的頭炮，由於七彩顏色所以被冠以彩虹Woven的稱號。此鞋02年5月推出，全球限量1,500對，炒價$3,000，但仍然極受歡迎，尤其是女仔最被七彩顏色俘虜。

雖然AirMoc如今並非大熱鞋款，但藤原就對佢情有獨鍾，可能鍾意鞋款夠經典。但佢老人家更將AirMoc改為中筒，雖然呢對AirMocMid初出時並未被看好，於02年5月初推出時只賣$1,500左右，但到02年尾此鞋宣告全面斷市。

TerraHumara一向都係藤原愛鞋，未有HTM前經已推出過Monotone一黑一白特別版，所以推出HTM版係意料中事。今次的HTM版用上優質靚皮，加上用上佢老人家最愛的黑色，02年10月推出時即告斷貨，炒價$2,000仍不乏捧場客。

普通版的PrestoRoam一直未被看好，但藤原又再施展佢點石成金絕技，將PrestoRoam冠上HTM字樣，再加上特別版新色，於02年9月推出時一鳴驚人。

一對較為斯文嘅鞋款，於03年7月推出，一推出成為波鞋界嘅大熱之選，炒價$3,000，但只能維持半年，炒價即時回落至$1,200左右，是HTM一次小型的滑鐵盧。

02年11月，AirForce1乃大熱之時，藤原用上一貫做法，全黑靚皮，即時大賣特賣，藤原更視它為愛鞋，經常穿着HTMAirForce1亮相各大日本雜誌，時至今日亦然。

可以算是HTM最差之作，除冇炒價外，更被潮界視為HTM自殺之作，一度令HTM淡出潮界。藤原為救回HTM的聲譽，立即推出鱷魚皮Force1救命。

鱷魚皮NikeHTMAirForce1$1,299/a（6月28日正式發售）
呢對AirForce1是由藤原浩親自設計，用上獨一無二的壓印鱷魚皮而製成，鞋身附上HTMLogo及Hang-Tag，而鞋裡亦是真皮製造，手工精細，有黑、白兩色，附送原裝特大鞋盒，全球限量3,012對，不得不提鞋裡上每對獨有的SerialNumber，絕對獨一無二。但香港只配給到各40對，有買趁手！

■除有鞋睇外，每對鞋的後面更有小小的介紹，等各位知道每對HTM的來龍去脈。

■Exit為隆重其事，專誠喺門口裱起一幅大型的HTMAirForce海報。