昨日端陽假期，外圍股市變動唔大。天氣酷熱，正好游個龍舟水，但又怕海水唔乾淨。政府喺呢個時候推出195億元海港淨化計劃，冬姐都好識揀日子推銷政策。
政府尚未成功節流，又大手筆搞海港淨化，可能會被人話大花筒。不過，政府花錢在美化香港身上，不旦可即時增加就業，刺激經濟，長遠對旅遊業發展都有好處，呢啲錢真係唔怕使。
遠東生物制藥（399）主席現時仍然未有下落，看來蔡生在國內可能出事之說，空穴來風未必無因，至於出咗乜嘢事，暫時仍未曝光，睇嚟遠藥短期內未必可復牌。
據聞停牌當日，有唔少篤手指客撈咗大批貨，同時又有炒家因股價大跌被證券行追孖展，點知股份最後被停牌，篤手指客未能及時沽貨平倉，需要真金白銀畀錢埋單，炒家亦要沽其他股份套現找數，所以連累唔少三四線股大跌，結果件事令市場人士為遠藥停牌掀起爭議。
講句公道話，如果停得慢，港交所（388）會被人話反應遲鈍；停得快，又被人指干預市場運作，令投資者有貨沽不得，港交所今鋪都算左右做人難。遠藥今次事件唔尋常，阿虎馬後炮認為停得有理。
近期新股表現不振嚇怕投資者，華潤上華最終要擱置上市，大新銀行（2356）及李寧（2331）仍向外界表示認購反應良好，其中李寧可能以上限每股2.15元定價，市場傳出配售有10倍超購。不過，阿虎唔少朋友都話被近期新股表現嚇怕，對認購李寧冇乜興趣，且看明星效應有多大作用。
阿虎