香港7.1精神，終於獲得確認，中國國家副主席曾慶紅，去到北非，都要評論番兩句，發出軟招，聲稱「香港人可以用任何方式」表達任何訴求，包括民主！
曾慶紅咁講即是大前提肯定7.1遊行示威，係合情、合理、合法，係基本法所規定嘅憲法自由，同朱育誠所講民主即係「港獨」、王如登所講示威即是搞「對抗」，曾慶紅嘅立場，突然間又唔同咗。
無論係串燒雙簧，定係軟硬兼施，係上高派系鬥爭，定係中國政府間歇性良心發現，曾慶紅呢句說話，即是承認香港人7.1可以遊行大示威，只不過請你哋畀番兩分面中方，唔好大嗌「打倒共產黨」一類嘅刺激性口號。
曾慶紅表達善意，香港人亦唔會唔收到。7.1大遊行唔係賀回歸七周年，而係慶祝7.1五十萬人大遊行一周年，由去年七月一日起，港人脫胎換骨，贏得舉世尊敬，大家不妨各取所需，香港人大可以「慶祝」照舊，不過就係慶祝7.1大遊行，顯示人民力量嘅光輝一周年！
去年嘅五十萬人大遊行，成功令到二十三條無限期擱置，兼迫令高官退職，至於叫董建華落台，呢樣嘢有冇成功，則見仁見智，其實一年來阿董肉體未落台，精神上早已下台，若然唔係，都唔使中方直接行出前台，隻抽民主派。今年7.1，反為唔使急於要阿董落台，維持現狀，阻止其他衰過阿董百倍嘅奴才上台，更加重要。
曾副主席既然話，唔好分化，要以團結為重，7.1遊行示威亦可以提出民主訴求，咁香港人自然要聽從領導人指示，今次7.1大遊行提出以下訴求：
一、嚴厲聲討胡應湘、朗尼陳等口臭商人，佢哋叫香港人移民離開，製造分化。特區七年，未見呢班地產商聽從國家指示，投資高科技，協助經濟轉型，反為吓吓都勒索政府，沉迷地產投資，呢亭奸商係港人公敵。
二、嚴厲聲討鄔維庸、曾憲梓等社會敗類，佢哋多次侮辱港人，話香港人係狗，又「漢奸」又「賣國賊」，對香港選民用選票推舉嘅代表，肆意潑糞，與民意為敵。
三、質問吓唔知買大定買細、往往買大就開細嘅民建聯：○七○八普選、二十三條立法、無居權兒童問題，究竟前後轉過幾多次軚，呢個黨究竟係搞邊科，係民主建港定係假民主惑港？
至於其他人等，無論係堅持要求○七○八普選，定係唔想邊個做第三屆特首，定係支持陳太及港人言論自由，定係紀念屈原投江，預視布殊連任，總之有乜訴求，係咪都應該響應曾副主席嘅講話精神，7.1大家出嚟行吓消消氣，「繼續微笑賀7.1」，增進血液循環？
傳真︰2623-9278
電郵︰