由於自己的電影正在上映，所以非常留意票房走勢。普遍來說，如果一齣電影的日場收得好的話，夜場只會更好，但近來卻出現了反常現象，日場票房不俗，但夜場觀眾卻大量流失，不只是一齣戲，是全部一樣，這個應可稱之為「歐洲盃現象」。
酒吧內，看球賽的女觀眾超過三分一，跟男觀眾的比例接近一半一半，肉緊程度則肯定有過之而無不及。時尖叫、時詛咒、時將面前啤酒一飲而盡。靚仔球員將女孩子帶進睇波行列，引人入勝的球賽令她們成為球迷，很多OL現在選擇寧願睇波唔睇戲，真是始料不及。
不過，也難怪大家咁鍾意睇歐洲盃，確實係好睇、緊張、香豔、有娛樂性兼出人意表，緊張者當然是指球賽本身；香豔者是指大會的攝影機不時會捕捉一些座上迷人女觀眾，驚鴻一瞥，確係香豔。娛樂性很多時來自那個銀底黑間的新皮球，此球專為本屆歐洲盃設計，又輕又彈又飄，無論係射嗰個或者接嗰個都係估估吓，你話幾有娛樂性？未入八強但經已出現三場極度估佢唔到的賽事，施丹單人匹馬最後一分鐘射爆英格蘭；荷蘭先入兩球坐定笠六，捷克打甩髀怒轟三球反勝；兩牙大戰，葡萄牙知恥近乎勇一球踢甩西班牙大牙。
表面上，《我要做Model》的對手是《木馬屠城》及《八十日環遊世界》，其實大家的共同對手肯定是歐洲盃。