一年一度嘅端午節，全港好多個地區都舉行龍舟競渡，唔少高官都有落區做頒獎嘉賓，特首董建華今次就好醒目咁揀咗落有錢佬最多嘅南區主禮，喺大會主持努力「協調」之下，佢終於感受到呢幾年難得一見嘅市民「夾道拍掌歡迎」場面。
董伯伯人未到達會場，主辦單位已經叫齊各個嘉賓列隊準備拍掌歡迎。當佢老人家一到，大家都好識做咁同佢握手，主持人又好識做咁叫喺海上嘅漁民拍手歡呼，又話董伯伯作為香港最高領導人，難免會俾人前呼後擁吓！當董伯伯離開會場時，行上專車前，唔少市民都爭住同佢握手，南區居民咁熱情招呼，令董伯伯笑到見牙唔見眼，佢重主動叫香港人要團結拼搏，搞好經濟；但當被記者問到7.1遊行，佢就即刻走夾唔「唞」。
（圖）董伯伯（左）出席香港仔龍舟競渡大賽做頒獎嘉賓，受到空前盛大嘅歡迎。
凌樹輝攝
傳真︰2623-9278
電郵︰