地產市道暢旺，代理收入豐厚，部份更興起置業念頭。港置東港城梁嘉華話，同事Sunny，入行半年，已經搵到第一桶金，夠畀首期，所以即買將軍澳蔚藍灣畔。樓價二百一萬，首期一成，其餘做晒按揭。若果以一成首期計，要二十一萬，即係話佢平均每月搵三萬五以上。
梁嘉華話，住藍田嘅Sunny，為人勤力，所以至有咁嘅成績，佢促成最多就係蔚藍灣畔。對個盤咁熟，難怪買都買番呢度。聽講，佢係買畀雙親住，認真孝順。
Sunny之前做過會計，看好樓市至轉行，半年已搵夠首期，唔知同佢數口精有冇關呢？
蘭西早前講過，中原高層熱衷寫作，重結集成書，其中營業董事一姐劉瑛琳，新書《地產樓聲璣》面世，一姐周四特別舉行慈善義賣酒會，邀請一眾友好出席，有份幫一姐寫序嘅梗係一定獲邀啦。個酒會分三節，由傍晚六時至凌晨。
本書除介紹樓市外，又講管理心得等，為行業發展盡一分力，兼做善事，值得支持。聽講，書未出街，已經反應好好，接落唔少預定。街外要到下周至有得賣，每本五十蚊。
美聯員工自發成立嘅美善會義工隊，十多名義工，日前到訪藍田循理會白普理德田老人中心，提前同七十多位長者歡度端午節。除咗送應節食品及禮品外，當然唔少得節目表演，同老人家齊齊玩遊戲啦。令人覺得「人間有情」。
屋之島豪宅部經理歐志康話，今個月豪宅租務放緩，二十日都係得六十五單，上個月有八十五宗，要追至平手，看來不易。
不過，有啲個案幾特別，中半山麥當勞道十號肇苑，二千二呎單位，放盤兩周成功租出，都算快手，一般要成個月至得。
聽講，個客指定要租喺呢條街，而供應向來不多，所以咪咁快。
蘭西
電郵地址：
