歐洲盃至今為止，最好睇嘅一場比賽可能係荷蘭對捷克。左丁山事先投注，買荷蘭贏，荷蘭首先射入兩球，左丁山以為呢鋪重唔贏硬？於是上床夢會周公，周公話畀我聽，捷克贏咗。唔係啩？當堂札醒，已是早上八點，開電視機睇重播，捷克竟然連追三球，反敗為勝，尼維特直情係超級球星，活力重好過施丹。一場咁高水準嘅球賽，荷蘭應該輸得心服，左丁山輸咗錢，冇得好講。
聽日凌晨，捷克對德國，你估邊隊會贏呢？另一場荷蘭對拉脫維亞，照計荷蘭應該贏起碼二比○，但只要德國贏捷克，荷蘭就要出局。有人恐怕捷克穩握出線權，會放軟手腳，保留實力打八強，於是德國有可乘之機。左丁山唔同意呢個睇法：第一，歐洲球隊，特別係國家隊，比南美與亞洲球隊更有體育精神，極少打假波或者故意軟腳蟹，我哋唔好以小人之心度君子之腹；第二，捷克歷史上有兩個「敵人」，其一係俄羅斯（代表昔日之蘇聯），二次世界大戰後，蘇軍霸佔東歐，捷克淪為附庸，一九六八年布拉格之春慘被蘇軍鎮壓，捷克人永世記住；其二係德國在二次世界大戰入侵捷克。捷克係一個小國，好注重國家榮譽，在球場上打敗德國，係難得嘅光榮，如果放軟手腳輸畀德國，球員邊有面子回國？
以波論波，捷克氣勢如虹，全隊合作純熟，尼維特狀態巔峯，前鋒巴路士弗到震，德國雖然擅打逆境波，往往絕處逢生，但呢一鋪照計難逃一劫咯。一於買捷克贏！