中大校長金耀基（圖）六月底由中大榮休，中大人呢個星期六喺港麗為佢舉行惜別晚會，筵開近五十席。
金耀基喺中大任教三十四年，貢獻良多，校長既博學、又幽默，所以深受學生同傳媒歡迎，好多中大現任教授同講師都係佢嘅高足。不過，比較奇怪嘅係臨退休之前，校長卻謝絕所有傳媒訪問，莫非想低調離開？追查之下，發現校長原來最近身體抱恙。唔使驚，唔係乜大病，只係雙眼有啲矇，要做白內障手術啫。
由於喺短期內做完一隻又一隻，所以要時間好好休息。八方諗呢個星期六大家見到校長時，記得睇吓佢對靈魂之窗，係咪大放光明。
金校長喺學術界嘅地位崇高，堪稱社會學泰斗，學術散文都掂，最出名嘅文章名「行政吸納政治」，甚受當年港英政府重視。
有人話，呢個世界好多時候都係時也命也，如果唔係李國章加入董政府，金耀基未必肯接棒做校長。由下個月起，中大正式進入劉遵義年代。
傳真︰2623-9278
電郵︰