國務院屬下嘅港澳研究所所長豬肉誠砌生豬肉稱「有人搞港獨」，一頂文革血滴子，發出呼嘯怪聲，笠落爭取普選嘅民主派頭殼頂，效果同向劉慧卿議員辦事處潑糞嘅行徑一樣，都係務求將民主派見血封喉，同埋為九月準備強行解散一個有三十席以上民主派議席嘅立法會打定底。
民主派立法會議員謾罵不還口，為顯示文明風度，上個月二十一號以立法會政制事務委員會名義，向朱所長發出邀請信，請佢嚟立法會解釋吓，所謂將香港搞成「獨立或半獨立實體」，有咩證據？
估唔到噚日政制事務委員會再開會，主席黃宏發話，朱育誠重係杳無音信。咁會唔會搞錯咗地址，朱所長未收到信？睇嚟唔會，因為通訊地址係特區政府提供，政制事務局局長林瑞麟重話，上星期搵過有關方面，對方「保證會回覆」。
民主黨議員張文光當堂扯火，話好難想像堂堂政府官員足足一個月都唔覆信，批評朱育誠有膽抹黑，冇膽面對，不負責任，兼冇禮貌。黃宏發心水清，估到豬肉誠拖到七月立法會休會，最後委員會同意向朱所長再發多封「邀請信」，一於唔畀佢含混過關。
傳真︰2623-9278
電郵︰