曾主演《狙魔人》嘅英國索女姬蒂碧金素爾（KateBeckinsale），近排啱啱俾一班英國影迷選咗做全英國最靚女星。不過我羅拉最近就搵到姬蒂一批陳年model相，當時姬蒂一頭短髮，散發住陣陣鄉土味，令人慘不忍睹。
現年三十歲嘅姬蒂，原來喺九一年、即係佢十七歲嗰陣，已經喺英國電視劇度做過啲二打六角色，當年一心想加入娛樂圈嘅姬蒂，重走咗去做模特兒，喺九六年，佢重幫模特兒公司影咗一批造型相，當年二十出頭嘅姬蒂束住一頭短髮，不過佢所擺嘅甫士造型生硬，個look娘到爆燈之餘，重有啲師奶feel，但佢後來發現自己唔係做模特兒嘅材料而中途放棄。
唔講你唔知，當時姬蒂仍然讀緊大學，佢考入咗英國著名嘅學府牛津大學，主修法文同埋俄羅斯文學，閒來就鍾意寫吓散文，重贏過兩次青年作家比賽嘅冠軍，堪稱高材生一名。