譚詠麟（阿倫）同李克勤噚日去到陳少寶位於尖沙嘴嘅上海菜館試食，馮仁昭都諗到佢哋唔會放過呢個機會去寸吓少寶。佢哋一坐低就係咁問少寶啲菜式名，阿倫問到其中一味係唔係瓜時？少寶話碟餸唔係瓜，點知阿倫話：「你坐得喺度，梗係唔係瓜啦，呢碟嘢叫『冇事』。」
之後阿倫同啲食客握手時，又叫人哋多啲幫襯，因為佢開始感受到間舖有正氣，跟住又講笑話：「天地有正氣，冇事嘅，人誰無過呀？知錯能改，善莫大焉，佢今日叫得我哋嚟，都係想借我把口話畀你哋知，同埋佢都預咗我哋乜都講。」
最抵死係阿倫祝少寶生意興隆，重話希望對方賺多啲正財，搞到少寶好尷尬咁話自己冇賺過唔正嘅財。而克勤亦唔輸蝕，佢寸少寶成日攞住個電話唔肯放，重估佢呢世都唔會再換電話款。總之佢哋不停你一言我一語咁話少寶有神打救。最後問到今次幫少寶宣傳有冇酬勞時，佢哋好得戚咁話：「總之佢今日賺咗啦，平時請我去剪綵要七位數㗎。」
一班《天涯俠醫》演員包括郭羨妮同唐寧噚日由肯雅返港，對於有周刊話佢哋杯葛梁詠琪（GiGi），郭羨妮話：「唔係嘛？又問呢啲嘢呀，呢啲根本都唔係事實，所以唔使理咁多。」而喺無錫拍完劇集《楚漢驕雄》返港嘅張可頤，透露下個月會去上海拍劇。
為了紀念梅艷芳，MusicNation噚日推出《梅艷芳經典金曲演唱會3DVD》，但有好多歌迷打電話去唱片公司，問點解阿梅隻碟只收錄咗九個嘉賓嘅演出？同埋會唔會再出其他嘉賓版本嘅碟？唱片公司方面就解釋話因為版權問題，唔會再有其他版本，呢隻係限量版，重話係終極版本喎！
薛家燕（好姨）即將同孔慶翔（William）合作拍新片《我阿媽發仔瘟》。好姨噚日喺將軍澳話：「我都好開心，聽講套戲最初想搵鄭中基，但佢冇期，咁啱我同William個爸爸又識得，咪幫手穿針引線囉，佢大約八月會返香港，而呢齣電影係一套古裝片。」咁孔慶翔咪要着古裝？馮仁昭都幾期待喎。
惠英紅噚日以一身便服打扮，出席電影《神經俠侶》嘅開鏡拜神儀式。一向投資有道嘅佢，認為買政府債券係一項唔錯嘅投資，佢話：「我𠵱家等緊政府出債券，諗住一出就即刻買，就當做係一種投資。」咁識令荷包進帳，咁咪儲儲埋埋唔少？
林心如噚日去灣仔出席護膚品活動，講到早排俾記者問到同唐季禮嘅緋聞時拒絕受訪，所以俾人話扮大牌。心如解釋：「係一場誤會，因為嗰次係台灣嘅助手陪我，咁佢同公關公司溝通上出現問題，先會咁樣。」問心如係咪好怕被人問起同唐季禮嘅緋聞，佢話：「唔驚，其實我喺香港冇乜圈中朋友，同朋友出街食飯係好正常。」係囉，男歡女愛都好正常啫。
