孫明揚上周六話○七年住宅落成數目有萬一個，以為增加透明度，點知九鐵物業總監林濬星期日無端端出嚟話，西鐵馬鐵幾個上蓋物業明年會開始招標，總共有成萬個單位供應，搞到孫公好鬼尷尬，其實九鐵講嘅係○八年之後嘅事，唔使咁緊張。
鬍鬚孫雖然忙，不過為咗睇歐洲國家盃，呢輪佢晚晚都好遲先至瞓，孫公話唔瞓都係值得嘅，好似上次世界盃喺日本同韓國踢，香港人都要上班，就冇得睇直播。
八方問孫公睇好邊隊？原來佢唔鍾意英國波，反而睇好葡萄牙、意大利同法國，所以前晚佢睇到四點幾都話冇問題，因為葡萄牙以一比○贏咗西班牙，可以晉身八強。喺大學讀數嘅孫公一直對賽馬有研究，但係賭波呢樣嘢就考起佢，佢話自己一概唔識，所以從冇投注過，睇嚟馬會都要開番個賭波訓練班，教識吓市民點樣落注嘞。
（圖）孫明揚雖然公事繁忙，但係有波睇就寧願唔瞓。
傳真︰2623-9278
電郵︰