到馬場董事廂房跑馬，食自助餐之時，見到有魚翅壽司，心諗啲董事真係識食噃，魚翅壽司？豪唔豪啲呀？多口問一句：「魚翅喺邊度嚟？」服務員笑笑口：「來自日本，人造嘅，即是係假魚翅。」假魚翅？唔知係乜，卒之唔食。
後來碰到飛機C，佢周遊列國，對食物無所不知，問佢有冇食過假魚翅，飛機C話：「馬會啲假魚翅壽司，幾好食㗎，你唔試就笨。香港人最鍾意食魚翅，但魚翅自鯊魚而來，食魚翅等同破壞海洋生態，𠵱家鯊魚數量已日漸減少啦。一啲老友去海洋公園餐廳擺酒，話明冇魚翅唔似樣，但係海洋公園係保護海產，與海豚為友嘅地方，點肯供應魚翅吖。後來諗到折衷方案，只供應假魚翅，客人都話制噃。」中國人鍾意魚翅，鯊魚注定遭殃。
梁道長聽見飛機C咁講，有啲佩服海洋公園緊守原則，又諗起自己曾經到中國參觀唔少動物園，所見所聞，甚為騎呢。梁道長話：「動物園有唔少動物，幾好睇，但最過癮嘅就係到動物園嘅零售店。外國動物園零售店賣紀念品、熊貓公仔、動物玩具等等，但嗰間中國動物園內，賣嘅竟然係蛇膽、鹿鞭、牛角、虎骨、蛇膽酒之類，重猛咁講佢哋貨真價實，包冇假嘢。聽到我反晒胃，大佬呀，帶細路去睇動物園，係教佢哋認識動物、愛護動物、保護動物，唔係向遊客示範將啲動物拆骨煎皮呀！」
改變食鹿鞭嘅想法，需要長時間公民教育，香港叫做做得唔錯，中國就有排都未得咯。