6場騷5粒鐘賣晒飛<br>阿Sam詐癲納福

6場騷5粒鐘賣晒飛
阿Sam詐癲納福

許冠傑(Sam)本月三十日開始在紅館再開六場演唱會,昨日公開發售的二萬多張門票,五小時內售清。阿Sam到場支持fans時,否認患上抑鬱症,反稱平日是詐癲納福。

昨日中午時分,歌神許冠傑乘開篷寶馬抵達紅館,陪伴他左右的,正是模特兒出身的新寵Annabelle,她撐着豹紋雨傘為阿Sam遮擋太陽,相當體貼。

「林振強望住我哋」
阿Sam出現令現場fans連番哄動,不停要求他簽名和握手,雖然他沒有下車,只在跑車上拿無線咪獻唱,但現場反應依然相當熱烈。阿Sam說:「買唔買到飛呀?買唔到唔緊要,今日有免費騷。𠵱家送隻歌畀大家,林振強喺上面望住我哋,我唱首歌紀念佢,就係佢寫畀我嘅《心裏日記》。」阿Sam又即時介紹身邊的Annabelle給fans認識,指她是中法混血兒,並為對方起了「曹不悔」這個中文名字。

「其實癲都好爽」
阿Sam又說:「莫名其妙,乜嘢叫抑鬱症?係咪屈低嗰啲?其實我自從關帝上身後都癲癲肺肺,一係我掉關帝像落海,大家咪冇嘢講囉!其實癲都好爽,出街唔使睬人,call又唔使覆機,可以詐癲納福。如果我掉關帝落海,我咪做番普通人,攞支打狗棒周圍打人,但如果掉關帝落海,我就連演唱會都唔做㗎啦,咁你哋話好唔好呀?」現場fans聽罷即高呼「唔好!」之後阿Sam再獻唱《天才白痴夢》後便驅車離去。
此外,原本阿Sam計劃為拍戲而取消十月六至十八日的十場個唱,現在又有變數,主辦單位恒藝亞洲負責人丘亞葵透露,他們已入紙申請場地,若紅館方面批准,便如期舉行。
採訪:胡比
攝影:陳志嵐

許冠傑徇眾要求,逐一與fans握手。

許冠傑替Annabelle(右)起了個中文名,叫「曹不悔」。

昨日有約六百名市民到紅館的售票處,購買許冠傑的個唱門票。