劉慧卿議員辦事處，終於遭到左仔狂徒縱火，真係俾陳太講中，由中方吹雞搞起嘅特區文革，由「愛國論」大批判開始，逐步升級，終於演變為恐怖暴力行動。
陳太本來苦口婆心，語重心長，叫中方唔好亂搞，點知反遭土共發動宣傳機器瘋狂噬咬，老左話中國經歷過文革，「經一事長一智」，又點會容許文革重演。正如信報老闆林行止話頭，烏龜背蠍子過河，隻蠍子係都要插烏龜，唔係佢想，而係佢呢隻毒物嘅本性，果不然，喺梁耀忠議員辦事處遭到潑屎、司徒華在街頭遭到推撞攻擊、維園共伯追打無辜青年之後，重升級到縱火，警方會點樣做？睇佢哋對待醜惡暴戾嘅維園共伯嘅一副笑笑口欣賞嘅態度，幾乎可以預卜，案件會不了了之。
就算捉到縱火兇手，分分鐘又係家住北角、六七十歲、目光呆滯、貌似有輕度精神病、一開口就大嗌「打倒美帝」、「毛主席萬歲萬萬歲」嗰隻，叫大紫荊獲獎者楊光，或者工聯會鄭耀棠認領番去慢慢安置就差唔多，就算解送法庭，好似上次梁耀忠潑屎案咁，個親中阿伯，只罰款一千蚊，平過佢學鄧小平吐一篤痰，咁又點會令到啲愛國恐怖分子唔覺得「愛國」原來係一樣成本低賤嘅刺激遊戲？
向梁耀忠潑糞罰一千，今次向劉慧卿縱火，最多罰千五，係邊個將香港搞亂？盲嘅都睇到：唔係民主派、唔係李柱銘司徒華。
都係專責選舉嘅胡國興大法官有眼光：佢話今次九月投票，應該邀請外國專家來港視察。
胡官即時遭到老左喺某啲專欄一輪潑糞式謾罵。呢班嘢愈謾罵，就愈證明胡官係正確，一九九六年立法局選舉，都有英美外國議員來監督投票，佢哋重大讚港人投票秩序良好㖭。今年投票，為凸顯香港係一個國際都市，當然要請外國專家來觀察，不過，因為香港亦同時係一個中國嘅普通城市，先至有潑糞放火呢一類暴力行為，胡官應該考慮呼籲聯合國維持和平部隊進駐票站，若然遇到暴徒搶票箱之類，開槍格殺勿論。
點解會咁，市場人士話，連土共嗰瓣，都唔知北京邊個話緊事，就好似文革時唔知係周恩來定江青管緊香港。為求表現，就梗要情緒化癲到盡。至於民主派話「還政於民」，喺北京有一個派系嘅人馬好反感，因為佢哋認為其實民主派由老江撐腰，若然唔係又點會嗌「還政於（江澤）民」？所以為咗全面照顧中央感受，民主派係咪除咗「還政於民」之外，重要加嗌一句叫做「前程似錦」呢？
傳真︰2623-9278
電郵︰