端午節前，個市氣氛繼續麻麻，恒指微跌9點。
平淡市中，亦有醒神股票，例如駿威（203），曾高見2.875元，埋單2.80元，升7.7%。駿威Call輪中，遠期嘅9147，收27.5仙，升41%；9285收14.4仙，升25%。睇吓數據，9147喺12月中到期，溢價30.5%，槓桿率10.2倍；9285喺11月中到期，溢價37.9%，槓桿率3.9倍。呢堆數據，好難話有吸引力，除非認為正股會繼續升得好勁。
正股升，啲相關Call輪唔係一定跟住升。駿威Call輪9204同9228分別喺冇成交之下，散22%同9.5%，唔跟正股升係因為時日無多，溢價高，正股要升多一兩成，啲輪先至唔使作廢。要正股短時間內升咁多，喺咁嘅市況之下並不容易。另1件駿威Call輪9373，好多日前已經係1仙求售，亦都係冇人肯要。幾日之後就冇得買賣，行使價4.4元，正股𠵱家至係2.80元，隻輪真係送都冇人要。
滬杭甬（576）收5.05元，升3.6%，係醒神之作，帶動兩件Call輪急漲。9526收10.8仙，升幅42%，8月初到期，即係下月底最後買賣，溢價21%，望正股個零月內升21%以上，唔實際。9561收64仙，升幅33%，12月中到期，溢價21%，槓桿率7.9倍，數據比較9526實際啲，但溢價如此，仍係過高，又係買唔過。
章盛