連跌好幾日嘅大陸汽車股，噚日終於見到反彈，獨領風騷仍然係駿威汽車（203），原來有班分析員剛剛上完去睇廠，陸續出報告唱好，難怪駿威大升7.7%，收2.80元，成交股數高達9297萬股，金額2.57億元。`
經紀黃話，分析員覺得駿威掂，主要係睇好廣州本田前景，另外亦因為有效控制成本。
不過，部份芬佬仍然睇唔好汽車股後市，所以趁噚日反彈沽貨。
雖然有汽車股沖喜，但民企股仍受遠東生物制藥（399）笨豬跳餘波影響，好多民企股股價依然弱過藥煲，好似超大現代（682），噚日在歐資行力沽下，跌7.4%，收2.20元。
除咗特別多是非嘅超大外，同係民企兼藥股嘅維奧生物科技（1164），雖然曾獲董事在市場上增持，但股價仍然唔多得，噚日又跌2.4%，收0.41元。
經紀黃話，一來係大市氣氛差，二來係有分析員估計盈利增長放緩，所以股價先至搞到咁弱。
慕容小初