香港人有幾熱衷買樓，睇呢宗成交就知。
美聯物業分行經理梁文輝話，剛促成一宗鴨脷洲海怡半島成交，買家係一位八十歲婆婆。
呢位婆婆現住東涌區，因見海怡半島環境清幽，空氣好及設施齊，加上有親友住附近，所以興起搬家念頭。
雖然佢八十高齡，但精神好，行動自如又精靈。代理精選啲單位，由佢兒孫睇過，認為啱，佢先至出馬。每次用半個鐘睇幾個單位，睇咗三次就扑槌，用二百六十五萬，買入十三座中層E室自住，三房間隔，近八百方呎，呎價逾三千三。
由於銀行唔會承造按揭畀高齡人士，所以呢位婆婆以自己名義一次過付款。
梁文輝話，呢位客係東涌區同事轉介嘅，佢印象中，年紀最大嘅買家，都係六十幾，今次可謂破紀錄。
鰂魚涌太古城因交通及購物之便，租務向來暢旺，同時古靈精怪嘅租約比其他屋苑多，好似近日接連出現兩宗短租成交，其中一名租客因為啱啱買咗太古城單位，想喺裝修過渡期租番同一屋苑，方便跟進裝修，為期兩個月。
至於另一位係外籍租客，留港兩個月公幹，由於市區服務式住宅，呎租至少三十蚊，太古城租金唔單止平一半，出入買嘢重非常方便，於是委託美聯曾志光幫手物色。
兩個放租單位業主，反正未有長約租客承租，其中一名咁啱短期內離港，唔得閒處理租盤，丟空倒不如租住先，索性收貴市值租金一成租出。
業主租客一拍即合，經紀又可以收足佣金，一舉三得。
中原九龍商舖部高級經理游院玲話，資深張姓投資者，上月購入的深水埗欽州街九十四號黃金中心地庫、一樓和二樓合共近二萬九千方呎連約舖位，現以二億四放售。
蘭西翻查資料，呢個黃金戲院舊址舖位，上月邵氏以大約億五賣出；如果新業主成功以目標價出貨，就有近一億落袋，賺六成。
聽游院玲講，新業主係有計之人，想趁物業未曾成交「摸出」，更仿效發展商提供租金補貼，個舖本來每月收六十萬，如果買家肯畀二億四，頭兩年每月保證月租百二萬，令回報率由三厘倍升至六厘嘅吸引水平。其實都係羊毛出在羊身上，買賣雙方各取所需。識得包裝，對投資物業有起點石成金作用。
越秀投資為促銷薄扶林富臨軒貨尾，早前推出「生活增值計劃」，買家獲贈南沙濱海花園別墅一幢，計劃推出後，率先吸引的竟是該盤業主。
利嘉閣高級區域經理楊建文表示，接獲一名業主，出價一零五零萬，洽購其中一套「富臨天下」相連單位，面積一六零四呎，呎價六五四六元。楊建文透露，有關交易可望在短期內落實。
呢名買家之前都曾經睇過上述單位，但最後買咗分層，今次見有新計劃推出，便萌換大屋念頭。
中原股東王文彥同夥計張奕威在網頁內的筆戰，引起地產代理監管局關注，皆因王文彥揭發中原工商舖部未有向地監局申請「營業詳情說明書」，地監局噚日發表聲明，指凡在港從事地產代理業務，都要攞牌，否則屬違規，查出可以紀律制裁。
不過，張奕威在王文彥戳爆後，已經即時補鑊，入表申請，相信可能唔使被地監局將軍。
另外，對於周日發生地產代理衝突事件，地監局對有從業員的不專業行為，表示遺憾。而行政總裁陳佩珊重申，該局對事件非常重視，對違規者的懲罰，可以包括吊銷牌照。而該局已同發展商聯絡，以加強維持售樓秩序，並會派員到各展銷處巡查。各代理要小心同自律嘞。
蘭西
電郵地址：
