香港有好多補習社，為學生補會考、高考，因為要補習嘅學生太多，補習學校肥過肥仔水，於是就產生一啲補習天王，一位HSir同學生補中文，全盛時期聽講月入二十萬，真係嚇死人。大凡有亞洲學生嘅地方，就有補習，睇吓東京、漢城、台北、香港，補習社遍地開花，係一門大生意。
說來慚愧，成日喺中環行走，竟然唔知中環有一家全港最巴閉嘅補習社。十零年前，賓架N個仔就讀於半山聖××名校，請咗一位律師同乖仔補習英文，令左丁山大開眼界。原來讀一啲聖字頭、M字頭、D字頭諸如此類嘅大大大名校以及國際學校，學生好需要補習老師補習，否則追唔上，考到八十九分，家長會俾老師召見：「請你注意貴子弟追唔上全班平均分九十三點五，以後要多加督促。」名校家長之中，不少係有頭有面之輩，點會容忍呢啲事發生，梗係請定補習老師喇。
呢日聽到律師洪講：「我個姪仔去補習，發覺學校內一位老師竟然係大官嘅千金，令佢老頭子受寵若驚。」乜補習學校咁巴閉。律師洪支吾以對，唔肯講。左丁山問咗幾位賓架，卒之賓架R露咗一啲口風：「學校設在中環商業大廈，由外國人主持，以前補習老師幾乎全部係英國人，現在特區政府收緊簽證，外國老師被逼鬆人，於是老闆轉而聘用外國名校畢業而成績優異，回流香港嘅年輕人做補習先生，大官個女讀書叻到震，返到嚟就立即俾補習學校延攬做兼職。」
呢間學校收費好貴，不宣傳，不公開招生，冇有關係人士介紹，一概不受，但仍然學生多到要推走，直情係香港超級名校。