摩指調高台股比重，部份芬佬將要增持台股，減持港股同韓股。有關改變，雖然要到11月同明年中先至分階段進行，但已呈弱勢嘅港股，可能會提早反映，跌多一浸。
恒指上星期大跌540點，周線圖上一大支陰燭穿頭破腳，乃轉淡訊號，短期炒輪，特別係恒指輪，揸Call要特別小心。
恒指日線圖喺5月尾有個上升裂口（11700-11839），上周五已補回部份，若全數回補，其勢將更淡。不過，𠵱家先至追買恒指Put輪，風險唔細，一則上述裂口區會有強大支持，二則恒指經過上周跌市，已呈超賣，隨時會有短線反彈，追價買恒指Put輪，好易坐艇。
唔想坐艇，不如等恒指反彈上50日線水平（目前在12040）受阻，先至執貨，到時買恒指Put輪，會買平好多。
買恒指Put輪，對象有3件。溢價較低嘅有9809，玩到9月28日，現價23仙，溢價4.9%，槓桿率12.9倍。9956溢價6%，槓桿率13.8倍，10月28日到期，比9809長1個月命，溢價高啲亦算合理。
第3件對象係9975，年期同9956一樣，溢價則稍為高啲，要6.7%，槓桿率亦大啲，有15.9倍。
最後提大家一句，明日係端午假期，外圍有市而港股休市，揸輪過假期要諗清楚風險。
章盛