購買新樓，特別係大型屋苑做投資，有保值作用，在升市時能賺取可觀利潤，不過樓價會較貴；部份投資者轉為向舊樓打主意，不求升值，但求高租金回報。
美聯物業分行經理鍾漢輝指出，鰂魚涌濱海街八十八號一個低層唐樓單位，便由投資者以六十七萬承接，七百呎，呎價只係九五七元，為市場新低價。幢樓毗鄰華蘭花園同面對和域大廈。
該名投資者一聽見單位放盤，睇都唔睇已經話買，原來佢心目中已諗好晒點搞，計劃間成四間套房出租，每間月租二千五，計落回報有十七厘九，幾年就可以回本。
鍾漢輝話，唐樓放盤少，銀行多數唔做按揭，就算受成數都好低，多數係投資者買。
政府最近兩次拍賣地皮都以高價成交，市場每次寄望樓市可以向好，點知實情相反，交投未有突破，今個月重差咗㖭。好似馬鞍山嘅嘉華星濤灣，今個月至今僅得四宗買賣，比上個月同期少一半；造價回軟幾個巴仙。
中原地產高級分行經理余志文話，上個月賣地後，業主將叫價調高五至八個巴仙，照現時市況睇，樓價要回落至賣地前水平先有得傾。
背山面海，海灘信步可達嘅住宅，重唔使一百萬㖭，係咪難以置信呢。但呢個係事實，不過就喺長洲，名為桂濤花園。
蘭西睇廣告，發展商影埋現場實景，單位售價八十零萬起，有一批係預留出租嘅，月租四千零蚊起，要嚟做度假屋都幾爽。重有示範單位睇㖭，今日最後開放啦。
地產代理予人市儈形象，不過，並非個個係咁，美聯大學堂培訓中心陳鳳儀，最近獲社會福利署頒發2004年度「首季義工之星──最開朗的義工」獎。呢個係網上投票選舉，陳鳳儀以六九五票大熱勝出，得票率達九成六。
蘭西覺得，代理多參與公益活動，對行業形象有唔少好處。
天文台噚日發出今年第一次酷熱警告，咁熱日子要喺室外開工，咪話唔辛苦，不過，如果有份工可以游水消暑兼有錢搵，唔知大家有冇興趣？份工屬臨時性質，日薪千五，包玩包食。相信全港暫時只有喺新地先搵到咁嘅優差。
呢兩日喺珀麗灣售樓處外嘅石灘，有班十分省鏡嘅比堅尼女郎，連續兩日由朝到晚，喺度嬉戲打波、踏浪玩水。聽講佢哋係受薪喺沙灘玩，做兩日每人實收三千，喺咁嘅經濟氣氛下，令人羡慕。
蘭西記得喺一二期開賣時，聽到唔少參觀人士質疑，個烏卒卒嘅沙灘，係咪可以游水？相信𠵱家睇到班靚女落晒水，應該會放心好多，果然高招。
蘭西
電郵地址：
