美股上周有如老僧入定，牛皮到極，港股就唔同，明顯弱勢，恒指一周下跌540點。利淡因素唔少，除咗例牌菜驚加息外，新嘅有民企爆煲驚魂，同埋摩指提高台股所佔比重（此舉會導致部份基金減持港韓股份，增持台股）。照睇大市調整未完，但正係趁低收集好股之良機。
水泥業係中國宏調重點降溫的對象，早前水泥價格曾由高位回落10%，但由於供不應求情況嚴重，唔排除水泥價格會再次上升。
安徽海螺（914）係全國最大的水泥生產商，今年4月初，股價曾升上14.2元的新高。過去半年，本欄曾3次推介海螺，首次推介時，股價10.25元，第2次係11.35元，第3次係12.55元，當時預期股價會反覆升上14元水平，才會出現較長時間的調整。由於宏調實施，海螺股價在升上預期目標後，便大幅回落，上周五收報7.6元。
海螺調整，正係低吸機會。如非宏調，海螺跌幅肯定冇咁大。3月時預測，國企調整完成後，下半年開展的另一個升浪，海螺可見19元；不過，現時整體經濟形勢有變（雖然水泥業所受影響並不太大），19元的目標價已不切實際，保守估計調低到13元，若能在8元或以下水平收集，向上空間仍逾60%。
03年（12月年結），海螺營業額56.5億元（人民幣．下同），升89.7%，獲利7.4億元，升177.8%，每股盈利0.62元，遠比市場預測為佳。期內生產水泥及熟料2560萬噸，升74.4%。
海螺新廠落成，產能提升，今年的目標產量將上升50%至3840萬噸。今年首季，集團按照中國會計準則編製的主營業務收入為18.72億元，升112%，獲利4.43億元，大增4.4倍。
第2季開始，水泥價格反覆，部份產品價格下跌，但局部地區的水泥價格已回升，而下半年的上升趨勢會較為明顯，業界預期今年全年的平均價格仍會比去年高。
每股盈利預測不變，04年為1.0元，05年再上升至1.35元（折1.27港元），海螺現價的05年PE只約6倍，以13元的目標價計，PE亦只係略逾10倍。
郭兆誠