自從美台雙方講明，若然中國攻打台灣，台灣自衞還擊，隨時可以轟炸大陸嘅三峽大壩，中方情緒大受刺激，進一步發癲，軍方高級將領，聯同人大政協等，聯名向中國政府上書，聲稱一旦三峽大壩遇襲，中方就應該放棄「永不首先使用核武器」的「承諾」，用核彈襲擊台灣！
中國自從一九六四年試爆原子彈，就多次對外發表聲明：「中國無論在任何情況下，決不首先使用核武器」。「任何情況」，就當然包括台美雙方或其中一方用常規武器嘅轟炸機轟炸三峽大壩嘅情況在內。中國現時又反口，聲稱「放棄承諾」，核襲台灣，真係喪過拉登，癲過金正日！
若然一項「承諾」，可以隨便「放棄」，咁重叫做「承諾」？中國若然膽敢核襲台灣，台灣未有核武，但自衞還擊，亦一定會轟炸埋大亞灣核電廠，到時香港就冚港鏟加一鑊熟。
本地親中老左勢力，平時冇嘢叻，最叻就係吹水，最近又吹話特區應該建成「亞洲瑞士」，因為瑞士有鐘表製造業，香港亦有。香港做另一個瑞士，完全有條件咁話。
呢種井底蛙言論，真係癡人說夢。人哋瑞士最大嘅優勢，係政治嚴守中立，唔偏幫美國，又唔挨近蘇聯。香港既然同祖國一體化，個個要親中愛國，跟口水尾聲討追打埋台灣民進黨，點樣做瑞士？不如𠵱家就由八方向台灣呼籲：香港六百萬市民，對於中台嘅爭拗，嚴守中立，既不促進統一，台灣想獨立，香港人亦冇意見，以後中台大戰，台灣炸豬炸狗，請扁哥高抬貴手，千祈唔好炸大亞灣喎。
因為到二○○六年，都重係呢一屆九流嘅特區政府統治，禽流感同沙士，經已證明呢個廢柴政府全無危機管理常識。若然二○○六年台灣修憲，中台爆發戰爭，台方一個導彈炸毀大亞灣，輻射大勁爆，香港六百萬人展開一場恐慌性人踩人嘅大踐踏，踩死一百萬人，核輻射又殺多三百萬，到時美籍商人陳啟宗一早就走咗返美國，曾鈺成又已經返加拿大會妻女，剩番個「三零部隊」喺度亂指揮，喺油尖旺銅鑼灣嘅一片恐慌暴亂之中，自己繼續揦屎上身，嗰陣時就算應咗羅康瑞、胡應湘把口：「唔鍾意嘅，可以離開」，到時一早坐頭等機位離開嘅，淨係得嗰班手持外國護照嘅「愛國富豪」同埋「人大代表」嘞！
「在任何情況下決不首先使用核武器」嘅承諾，都可以「放棄」，咁「港人治港，高度自治」又點？
《基本法》第二十七條：「香港居民享有言論、新聞、出版的自由，結社、集會、遊行示威的自由」，不過中聯辦助理王如登就話：七一若然搞遊行，即是同中央「對抗」。
唔怪得核襲台灣，好有可能成真，香港人好喺二○○六年之前，響應羅康瑞胡應湘，走得嘅好移民，冇外國護照嘅，都要做船民咯。
傳真︰2623-9278
電郵︰