名種貴婦狗護毛有道

【本報訊】一歲貴婦狗SharbelleCharlie&theCity在父親節傳來初為人父的喜訊，這頭樣子高貴、愛好交際的最佳純種犬（BestofBreed），昨日在香港會議展覽中心參加由香港狗會舉辦的狗展，全場矚目。

「用紙包住似電髮咁」
「我特登買佢返嚟配種嘅，最近已經成功同我屋企隻兩歲狗女交配。」貴婦狗主人陳小姐昨日向記者宣布這個好消息，其愛犬SharbelleCharlie&theCity來自美國，陳小姐拒絕透露牠的身價。小貴婦狗狗仔細細，性格又溫柔敦厚，甚受主人溺愛，「佢啲毛怕曬，平時好少出街，喺屋企都要用紙包住，好似電髮咁，保護狗毛。」
狗展上，比較起尊貴的貴婦狗，一歲的雄性約瑟犬Ciao則活潑得多。主人莫小姐在泰國買了一件天使翼小衣給牠穿着，相當盞鬼。Ciao性格開朗，每逢周末愛到寵物茶座與主人一起歎茶，星期天則去郊外遊山玩水。