民主黨肥仔明個油塘辦事處噚日開幕，除咗司徒華、楊森呢啲必到之外，重請咗主管就業嘅葉澍堃局長做主禮嘉賓。堃哥喺度呻俾肥仔明搵笨，當日肥仔明邀請佢，冇講清楚噚日剛好就係父親節加埋馬會煞科日，葉局長應承咗到又推唔到，結果搞到要同肥仔明一齊慶祝父親節。
見到堃哥咁慘，連馬都冇得賭，肥仔明即刻落足七彩鞋油，話堃哥係好官，所以先至請佢嚟，啲居民聽到後即刻鼓掌，堃哥霎時消晒氣。
肥仔明重呻窮話，個辦事處嘅電腦枱櫈全部係朋友資助，好難得先至搞到個辦事處，但佢請街坊就十分豪氣，辦事處一開，唔少街坊排隊輪燒肉同小食，情況猶如輪平安米一樣踴躍，冧掂晒啲街坊，怪不得連黨魁楊森都話，自己做地區工作不如肥仔明。肥仔明，你係得嘅！
傳真︰2623-9278
電郵︰