暑期猛片《蜘蛛俠2》早前喺東京搞咗個豪華記者會，率先播放咗二十分鐘新片片段畀大家睇，今次蜘蛛俠同新奸角八爪博士打得激烈之外，電影亦道盡身為正義英雄嘅無奈心酸。原來蜘蛛俠唔敢對由姬絲頓丹絲（KristenDunst）飾演嘅蜘蛛女瑪莉示愛，搞到愛人要同太空人訂婚。
新一集《蜘蛛俠2》加入咗多角戀同自我認同危機等元素。主角彼得礙於蜘蛛俠畀惡敵環伺，怕愛人瑪莉受到傷害，所以遲遲唔敢對佢示愛。瑪莉喺失望之際，結識咗太空人男友，重同佢訂婚，彼得當時重被委派做攝記採訪心上人嘅訂婚派對，搞到佢極之心酸。
更慘嘅係彼得雖然化身蜘蛛俠拯救世人，但佢竟然荒廢學業、放棄愛情，生活一團糟，甚至喪失埋自信。連主角杜比麥奎爾（TobeyMaguire）喺東京接受訪問時都話，今次蜘蛛俠嘅內心世界比上一集複雜，更令杜比對角色有特別感覺。
今集新奸角八爪博士由艾佛摩連拿（AlfredMolina）扮演，比起上集嘅綠魔更加厲害，八爪博士走去打劫銀行嗰陣，重挾持彼得嘅姑媽做人質，蜘蛛俠同八爪博士由銀行打到上天，點知蜘蛛絲射唔出，真係好令人擔心。