噚日係父親節,八方問財經事務局局長馬時亨有冇特別慶祝,點知佢話:「對我嚟講日日都係父親節。」
原來馬仔個大女已經學成回港,準備九月開始一邊同人補習,一邊喺港大修一個教育博士學位;而個細女就喺美國讀完大一,剛剛返港度假,兩個女都喺身邊,唔怪得馬仔咁風騷。
不過馬仔最開心係上星期,民主派罕有轉做保皇黨,所以可以成功修訂已經拖咗四年嘅稅收法例;漏洞堵塞後,稅務局局長劉麥懿明話可追收番六十七億,條數都唔細,馬仔今次靜靜雞搞單大嘢,真正係「悶聲發大財」,睇怕班商家佬以後都要提防馬局長出招啦。
另外馬仔嗰日喺記協周年晚會笑自己好似打高球,一開波第一棍就打出界,以後要憑鬥志急起直追。八方覺得馬仔呢個細路成熟咗,自從「仙股風暴」佢頭耷耷認錯,咁耐重學識自嘲,對於中國人來講,簡直係神迹。
(圖)馬時亨近來似乎成熟咗。
傳真︰2623-9278
電郵︰