特區政府日日都話要同中央政府「加強聯繫」，培養感情，不過，聽聞當局想搵人上京接駐京辦主任梁寶榮個高位，班高官都視如畏途，慘過叫佢上刑場。
起先話眾人媽打李麗娟有興趣，後來媽打突然因身體問題唔制。剛到任半年嘅副手張寶德，又話要返港做學術評審局總幹事，搞到呢個九月夠五十五歲嘅寶榮兄被迫再坐一會。
八方聽聞，呢個肯定唔係梁寶榮嘅心頭好，所以佢重同老董斟緊數，冇理由冇得退休㗎，你一直搵唔到人，唔通我就要喺大陸踎足一世，踎到《南方都市報》老總都放監，自己重未獲得自由？不過，其實唔只梁寶榮一個返唔到嚟，連駐京辦位總新聞主任蘇鑑洪一樣冇得走。Kelly同佢老細九八年一齊上京，一去六年，竟然冇換過人，人生有幾個六年可以浪費？八方聽聞新聞處最近已經通知各路人馬，可以入紙申請Kelly個位，想愛國搶韁，好趁手嘞。
傳真︰2623-9278
電郵︰