大市氣氛認真麻麻，繼上周遠東生物制藥（399）股價暴跌，觸發民企股拋售潮外，噚日又見招股中的華潤上華科技（597），公布暫時取消上市，非常打擊股民的投資意欲。
小初早排買咗一啲華潤勵致（1193），原本諗住華潤上華上市，對股價有所刺激，睇嚟小初今日都要諗吓使唔使沽貨計數。
經紀黃早前推介嘅TCL國際（1070），據講亦因市況唔係咁好，有芬佬想沽貨離場。
經紀黃話，早前覺得TCL國際掂，因為公司首季電視機銷量好掂，加上與法國佬合營的電視機生產業務虧損會減少。但最近有分析員見過TCL國際高層，話5月份的電視機、手提電話同埋電腦銷量比之前弱咗，加上大陸搞緊宏調，所以唔排除會影響營業額增長，因此傳出有芬佬想離場。
雖然TCL國際稍後可能會分拆TCL通訊上市，有人估計可能因此而派發特別股息，但遠水救唔到近火，市況唔好都係避一避穩陣啲，最多日後買過。
TCL上周五跌5.6%，收2.10元，成交股數1523萬股，金額3202萬元。
慕容小初