民建聯主席馬力近日努力拼選舉，又忽然熱心幫人爭居港權。上星期睇完電影《鄧小平》後，佢就急急撲上北京搞居港權。八方上星期喺《鄧小平》個首映禮上撞到馬力，佢同八方講，自從有意選港島區後就開始暴瘦（見圖），到𠵱家已經減咗十幾磅，得番一百四十幾磅！選舉極速燒脂真係有效，重使乜畀錢去纖體？
話說馬力去北京公安部攞彩期間，有一批農民咁啱喺公安部門口示威，抗議被當局打壓。班農民當然唔識馬力係乜水，但一見到記者當然乘機申冤，喺馬力背後「漾」來「漾」去，又舉牌又示威，搞到馬力突然間變咗為農民向公安部請命。
馬力近日不時喺中環派宣傳品，好鬼勤力。不過八方見佢嘅親民招數真係麻麻，派嘅時又唔望人，又唔介紹自己，搞到啲人攞完都唔知呢條友係邊個？
傳真︰2623-9278
電郵︰