精明消費：
有線電話大搜括懷舊款外形好煞食
時代進步，科技發達，家居電器更是日新月異。講到電話，現時大部份家庭都選用無線電話，但論玩嘢款式，有線電話一定贏晒，尤其是一些懷舊款，更有一班捧場客，唔信？睇過以下靚款，或許你都會忍唔住買番個。
記者：羅惠芬
攝影：陳盛臣、林栢鈞
Imagegirl：Niki（StarAsia）
懷舊款部屋必備
現時市面的懷舊電話，可分成真正舊版和復刻版，前者多數以攪盤為主，加上年代久遠，除接撥功能外，其餘功能已經失效。至於復刻版的有線電話，外形會抄足舊版電話，但部份細節會修改，例如電話盤會改為按鍵、撥電話的聲響會由「得得聲」轉成音頻聲。如何選擇，還是看閣下的個人喜好。
最具收藏價值：可口可樂電話亭
單是CocaCola這個標誌，已經是一個名牌。這台電話以可口可樂為主角，約13吋高，款式參照舊式電話，電話盤放在一道玻璃門內，聽筒則掛在旁邊，底部更附有一個皮製小枱面，方便隨時書寫，設計師更體貼地送埋可口可樂Memo紙和筆。
售價：$2,698（b）
橫向掣式排列
見慣方形排列的電話按掣，這個有線電話的按掣就一於玩橫向排列，夠特色之外，㩒落就好似㩒電腦Keyboard，非常過癮。
售價：$500（b）
有型飛機圖案
復刻版有線電話，圓形攪盤的中央部位有一飛機圖案，兩邊更各有一隻翼，造型搞鬼，啡紅色配粉紅色更是一絕，襯懷舊家具就啱晒！
售價：$280（a）
機身重唔易郁
手挽型電話，是70年代電話的復刻版，外形夠晒懷舊。拎上手發覺機身好重，嬌滴滴的女孩子可能會較吃力，但卻減低因電話太輕，避免撥號時會左右移動的麻煩。
售價：$1,480（c）
顏色有層次感
真真正正的二手舊電話，70年代款式，最珍貴是電話屬攪盤式設計。值得留意的是，其電話座和電話筒呈兩種深淺不一的綠色，極富層次感，設計明顯花過心思。另外更有橙、粉藍、黑和白四種顏色。
售價：$750（c）
車頭燈顯示來電
有人愛收集電話，也有人愛收藏古董老爺車。這具古董車有線電話，就算買回家作擺設也不錯。入電池後，有來電時車頭燈就會亮起，好鬼過癮。
售價：$1,398（b）
功能款啱實際人士
除了玩款外，有線電話亦講求功能，既有電話錄音、快速撥號、夜光、甚至有埋收音機、鬧鐘等，絕不簡單。
扮酒店夠玩嘢
酒店房間必有一份電話簿，列明酒店內的電話號碼。原來以前的酒店更細心，將客人最常撥的電話，例如RoomService、海外電話等印在電話上。雖已沒實際用途，但玩味十足。
售價：$598（b）
慳位掛牆電話
香港地價高昂，任何空間都不能浪費。這具紅色掛牆電話，設計簡潔亦具懷舊色彩，雖然沒有特別功能，但掛牆設計非常慳位，小家庭最啱。
售價：$678（b）
舊版攪盤最Classic
舊版有線電話，屬最Classic的款式，電話掣藏在底部，兼採用攪盤設計，是尋找真正懷舊電話者的福音。有黃、白、灰及杏色四種選擇。
售價：$1,400（c）
電話聽埋收音機
這具外形普通的家居電話，除了可以顯示多達99組來電號碼之外，更有鬧鐘功能及收音機設備。
售價：$198（f）
功能至強：真人發聲電話提示
電話頂可以顯示一幅以田園風景為主的動畫，且有16款和弦鈴聲，視覺聽覺同樣得到享受。最特別是有真人發聲的來電顯示功能，由真人聲播出來電者的號碼。
售價：$148（f）
快速撥號啱懶人
有某幾個電話號碼，你每天總要撥幾次，怕煩的話，可以用快速撥號的功能，Set好晒，要用時㩒一個掣就得。這款Microtel出品的有線電話就有此功能，重有計數機，邊聽電話邊計數都無問題。
售價：$168（f）
卡通電話夠Cute
卡通人物一向多捧場客，所以電話款式都不少。除了米奇老鼠、小熊維尼外，不少電話都會包裝成搶眼的外形，例如性感的紅唇、為人熟悉的積木等，單是視覺上已予人無限享受。
螢光來電顯示
透明膠製充滿i-MacFeel，有來電時，電話四邊更會發出螢光，非常有型。同時亦可儲存9個電話號碼，實用又美觀。
售價：$698（b）
夜光顯示唔怕睇唔到
最怕兩手忙碌時又要接來電，所以呢個電話有埋免提裝置就最方便。另外，此款電話的螢幕有埋照明功能，按掣更有夜光，就算夜晚要搵人講心事，都唔怕打錯電話搵錯對象。
售價：$88（f）
15分鐘任錄
美國通用出品的有線電話，有15分鐘時間錄音，可以留低愛人的甜言蜜語，等你隨時可以重溫。另外可儲存10個電話及59個錄音留言。
售價：$468（e）
卡通人物大晒冷
迪士尼卡通一向多擁躉，今次更集合埋米奇老鼠、唐老鴨和高飛狗，配埋個懷舊的黑色有線電話，Fans怎能不心動？
售價：$819（d）
沖涼鴨仔最親切
沖涼寶寶相信你一定玩過，一隻鴨媽媽帶住幾隻鴨BB，夠晒Cute。用佢做主角，感覺就似沖涼鴨媽媽由浴缸走出客廳，非常有親切感。
售價：$238（b）
似模似樣：性感紅唇男士最愛
一向只有女性拎住電話筒談天，不過，由今天起，男士們可能會有改變。皆因這個紅唇外形的家居電話，線條幾近完美。用佢嚟傾電話，將對方幻想成舒淇亦無問題。
售價：$998（b）
售賣點
（a） ClubX@LCX 31023674
（b） Kimihe 23122008
（c） TheMinimal 23692328
（d） Trendyland 27449633
（e） 中原電器 26283628
（f） 吉之島 34282138
含蓄唔幼稚
鍾意卡通人物又驚俾人話幼稚，可以選擇這款含蓄版的卡通電話。要細心留意才發覺聽筒有兩個卡通人物。除了WinniethePooh外，還有MickeyMouse選擇。
售價：$199（d）
Lego電話當積木砌
最懷念當小朋友時砌積木的情景。每件積木都需要逐部份親力親為自己砌，所以完成後特別有成就感。拎住這具Lego款電話，就似返回童年般。不過電話筒身較闊，手掌大者較適用。
售價：$178（b）
搶手跳跳虎
雖然不是新款，但這個跳跳虎有線電話真係好吸引，多次返貨都賣斷。唔想再錯失機會的話，今次一定要快，不過要待6月底才有貨！
售價：$749（d）