鍾欣桐（阿嬌）前晚喺油麻地幫「小木偶冰上奇遇記」配音，噚日就喺尖沙嘴一間雪糕店出席「願望成真基金會雪糕義賣」活動，阿嬌重捐咗一千蚊畀願望成真基金會㖭。
早前李彩樺自爆話初出道時曾經收到一個男藝人嘅情慾短訊，而陳冠希（Edison）亦係其中一個嫌疑犯，同Edison傳過緋聞嘅阿嬌，噚日就力撐Edison，阿嬌話自己雖然唔清楚成件事，之但係以佢認識嘅Edison根本中文唔多好，所以應該唔會係佢。
阿嬌話：「佢唔識中文喎！好似話佢嘅中文叻咗好多，但都只係識睇少少劇本，都唔會識打中文字啦！咁點會係佢呢？」乜英文就唔可以傳嘅咩？不過阿嬌應該了解Edison點樣追女仔嘅。
噚日係父親節，雖然阿嬌喺單親家庭長大，只係同媽咪生活，不過佢就同爺爺感情好好，父親節都會打電話畀爺爺，佢好想接埋阿爺一齊住，不過爺爺唔領情，又唔肯用工人，不過有叔叔陪住爺爺，所以阿嬌都好放心。
李克勤噚日同五百個歌迷喺洲際酒店舉行聚會，克勤話之前都出席過幾次劉德華同歌迷嘅聚會，希望從中學吓嘢，佢話：「華仔每年花費喺同歌迷聚會嘅費用好龐大㗎，阿倫（譚詠麟）比起華仔都係孤寒少少，我梗係冇佢哋咁財雄勢大，但係又唔想歌迷使咁多錢，今次係唱片公司畀咗六位數字支持呢個聚會嘅。」
梁漢文噚日出席一個港台舉辦嘅活動，佢話阿爸好鍾意睇波，所以佢買咗一啲已經畫咗嘅波飛送畀阿爸做父親節禮物，佢話：「我自己就唔賭波嘅，不過眼光唔錯，我見阿爸橫掂都要買波，咪用一千蚊買咗一叠波飛畀佢慢慢對，希望佢大豐收啦！」父親節重要刨成叠波飛，馮仁昭都戥梁漢文老竇可憐！
王菲同謝霆鋒分手後，一直有傳佢同李亞鵬拍拖，早幾日阿菲喺西安開騷，有人就見到李亞鵬喺當地出現，重同阿菲住埋同一間酒店㖭，前日李亞鵬俾歌迷用手機偷拍咗佢兩個出街，只不過影到背面，而內地有報道話佢兩個凌晨五點幾喺西安公然一齊遊法門寺，好鬼甜蜜咁。
Boy'Z噚日一早去咗灣仔出席活動，佢哋重同市民一齊做吓晨操。𠵱家佢哋忙緊拍新片《光榮任務》，Kenny話試過因為太攰，搞到化緊妝都瞓着咗，重核突到口含雲吞麵都瞓得着㖭。而佢哋早前出席旅遊公司周年活動時，有師奶fans竟然情緒激動叫佢哋唔好拆夥，佢哋都驚訝自己都成為咗師奶殺手。
