鄭經翰大班無端端發達，俾《東周刊》擺上封面，內容又猛講佢公司代理嘅滅蚊機，適逢蚊患爆發，呢勻重唔豬籠入水？睇完周刊故事，打電話向大班恭喜，大班鬧番轉頭：「有乜值得恭喜？滅蚊機根本從來唔夠賣，美國來貨少，我哋公司成日俾人追貨。出面有好多水貨，平好多，你敢買就去買水貨囉，你問我攞，一樣冇貨，唔該你排隊輪候。」
如果唔係有人去佢公司淋紅油，好多大班嘅老友都唔知有滅蚊機呢回事，𠵱家曝晒光，有記者同佢免費宣傳，真係明益得佢好緊要。大班話佢搬上山頂之後，好多蚊咬佢一家人，自從天台裝上滅蚊機之後，殺咗成千隻蚊，已經冇蚊咬佢哋咯。
講起山頂大屋，於是順便問埋佢「忽然富貴」還清滙豐銀行二千幾萬按揭之事？大班哈哈大笑：「係呀，樓市旺，豪宅價急升，我咪突然富貴囉。我買咗地下、一樓、三四樓，用咗四千萬，裝修用咗一千萬，總費五千萬，我問銀行一共借咗二千六百幾萬，成日囉囉攣，驚住俾人話我負上一屁股的債，於是，睇《星島日報》話豪宅好價，月前就賣咗一樓，三千呎賣三千萬，攞到錢就立即清還按揭，現在無債一身輕，都唔知幾爽。但係賣完一樓之後，樓價繼續升，另外一個經紀話我賣得太快，收少六百萬呀！」
識大班近二十年，佢結婚時買入太古城一個單位，價錢係八十萬，後來以百三萬賣出，搬去康樂園，大老山隧道通車後，就高價賣出搬去半山區，再換樓上山頂，呢條發達橋，大家有排學。