發達有邊個唔想，但係呢啲嘢真係唔係想吓就得；付諸行動，有啲人會買六合彩、買馬、買波，但係真正做到生財有道，似乎都係去學吓點投資穩陣啲！恒生銀行繼上次搞投資講座迫爆會展舊翼之後，噚日再創高峯，喺會展新翼嘅「回歸大會堂」，有超過三千個想發達嘅人到場，場面再度迫爆。司儀陳永陸好大口氣咁話，相信冇其他人敢喺呢個場搞投資講座。梗係啦，個場咁大，冇幾千人都會覺得場面冷清。
八方問過到場學嘢嘅人士，有位年輕靚太話：「有飛咪陪老公嚟聽吓。」呢位姓李嘅靚太原來都有投資開，希望喺講座聽吓最新市場消息，幫助日後投資決定。
在場另外兩位青年人李先生同吳先生一齊去聽講座，李生先話有投資開基金，而吳先生就暫時未有做投資，不過佢哋都覺得想發達，應該多啲聽人講吓，打好基礎，為日後打算。
除咗場面盛大，呢個講座重有得玩有獎遊戲㖭，大會預備咗一個手提電話，當陸叔問完問題後，就會講出電話號碼，邊個第一個打通呢個電話又答啱題目，就可以贏取獎品。電話好快響起，不過主持人就用好多時間先搵得到個幸運兒，事關個場實在太大喇！
（圖）陸叔（右）同恒生首席經濟師關永盛（左）到場，向想學嘢嘅觀眾教路。
傳真︰2623-9278
電郵︰