近排潮流興封咪，繼多位名嘴封咪後，連𠵱家喺港台主持《真心直說》、有「鐵蝴蝶」之稱嘅退休高官任關佩英都要封咪，佢噚日喺節目度解釋，話佢已經做咗呢個節目差唔多有一年，佢要講嘅嘢都講晒，唔知重有乜嘢好講，又話𠵱家香港政治氣候變化好大，香港人嘅價值觀究竟有冇改變，甚至將來會否改變得好厲害，佢都唔知。
一向以敢言見稱嘅鐵蝴蝶話香港𠵱家雖然重有言論自由，但你會發覺有啲人講出自己意見後，如果講嘅嘢唔啱聽，就會俾人斷章取義，成為眾矢之的。佢話如果再咁落去，《真心直說》呢個節目都唔知重有冇市場，所以佢決定主持埋嚟緊呢個禮拜六最後一集後封咪。八方一直都好欣賞鐵蝴蝶嘅敢言硬朗作風，如今連佢都話要封咪，咁香港肯真心直說嘅人可謂買少見少。
傳真︰2623-9278
電郵︰