陳慧琳與男友Alex拍拖十多年，隨着她在歌影兩方面的發展，二人聚少離多，更曾因而鬧至分手數月。對於失而復得的感情，Kelly和Alex當然會更加珍惜對方，Kelly說：「以前我哋成日會為咗冇時間見面嗌交，結果搞到分埋手，分手嗰段時間都幾傷心㗎，好彩我哋最終克服咗呢段時期，大家又可以走番埋一齊。」
Kelly續說：「𠵱家大家一有時間會盡量爭取見面，而且會互相體諒對方，所以同佢都少咗爭執，不過我嘅工作始終太忙，又成日唔喺香港，我都知對佢唔係咁公平，不過佢𠵱家好體諒我，我呢個男友真係好好！」
Kelly與Alex的感情已很穩定，她亦鎖定會嫁給Alex，不過談到婚期，Kelly卻表示：「同佢已經有默契，但婚事會係幾年後嘅事，我同佢都重係搏殺緊，所以唔會咁快結婚，除非要生BB啦，咁就會考慮。」
除了Alex之外，Kelly在娛樂圈可說是絕緣體，從來沒有與男藝人傳過緋聞，形象健康得如不食人間煙火，更從不肯給其他男士機會，Kelly笑說：「工作之外，我多數時間就喺屋企，從來都唔會同圈中人應酬，夜晚就更少去蒲，所以我男友對我係一百個放心，既然我心中只有佢一個，我係唔會畀機會其他人追求我，可能我係一個比較理智型嘅女性，知道邊啲應該做，乜嘢唔應該做。」
對不少人來說，Kelly的生活模式是獨立得來有點自閉和悶蛋，閒來她愛留在家中聽音樂、看書和上網打機，但她卻自得其樂，最近她沉迷一種電玩遊戲Hunter，最高紀錄曾連打十八個小時。她興奮地說：「打電腦game真係會上癮，我試過打十八個鐘都唔想停，打到口渴同肚餓就快快趣食啲嘢，然後就繼續打，有時玩到眼都紅晒都唔肯停，不過我知道打電腦game會上癮，所以呢排都唔敢玩咁多。」
獨居的Kelly雖然每逢大時大節才會與家人見面，但她與已離異的父母及姊姊和弟弟陳司翰的感情很好，她說：「同屋企人見面雖然少，但我哋會不時通電話，好似今日爹哋知我病咗，就好緊張咁打電話畀我，問我有冇食燕窩，又搵人攞藥畀我。呢排爹哋鍾意食健康食品，當然佢都畀唔少我食，有一隻奶粉又話可以增強免疫力，佢係都要我食，老實講真係好難食。」
