上市公司出錢做善事聽得多，員工落手落腳幫手都好常見，但係出動埋員工啲親屬就比較少有。中電為各大企業立下好榜樣，九四年經已有成隊義工隊嘅中電，進一步成立中電家屬義工隊，延續「送光‧送暖‧送溫情」嘅精神。
噚日中電常務董事阮蘇少湄亦有出席家屬義工隊嘅成立典禮，佢話𠵱家中電大大話話有近六百名員工參與義工活動，佔總員工人數超過一成，佢自己經常有參加義工活動，就連集團揸Fit人、中電行政總裁包立賢亦以身作則，不時同其他員工一齊去幫人。
阮太重話，佢諗住捉埋兩個女去做義工，實行母女三人行，一齊去幫助有需要嘅人士，不過暫時未諗到做啲乜嘢喎。阮太重同八方講，今年家屬義工隊嘅目標係招攬三百名家屬義工，進行逾一萬小時嘅義工服務時間。
（圖）三百名中電員工、家屬同嘉賓，齊齊以身體拼圖，慶祝義工隊十周年。
傳真︰2623-9278
電郵︰