對上幾個星期睇咗幾套溫情、愛情、懸疑片，今個星期轉吓口味，輪到驚嚇片登場。今個星期新返咗兩套「嚇人」片《見鬼2》同《救命》，戲種雖然唔係完全相同，不過講氣氛就同樣咁正，兩套戲由3個人氣女星擔正，雖然陰盛陽衰，不過喺3女落力演出下，亦擦出唔少火花，所以今個星期要睇戲，當然係《見鬼2》同《救命》。
記者：許福合
由舒淇擔正嘅《見鬼2》，故事唔算突出，不過氣氛一流，一開始講到失戀嘅Joey（舒淇）自殺不遂，執番條命，點知因此引嚟厲鬼纏身！Joey被救後正想重新開始生活，竟發現自己懷孕！而怪事不斷發生，例如喺火車站見到跳軌冤魂、搭的士與無臉鬼魂同坐、上孕婦班又會見到一個個幽靈喺每名準媽媽背後；Joey愈來愈擔心胎兒會被騷擾，於是要求醫生替她照超聲波，點知竟然喺屏幕見到胎兒怪臉！最後Joey要點樣先可以脫身？睇完正場，記住睇埋特別收錄中嘅另一個Ending，與戲院版唔同，可以換吓口味。
筆者認為睇鬼片睇法與其他片種唔同，首先就要留心，要投入，如果唔係就唔能夠代入劇情之中，好似《見鬼2》中，就有幾幕被嚇到彈起，其中「升降機」一幕就極為恐怖，雖然有啲人覺得可以拍得再好啲，不過女鬼轉身一幕效果已經非常震撼，其次巴士站一幕亦非常得人驚，突然有人喺面前墮地，電影中就做到令觀眾有一刻麻痹感覺，對追求刺激嘅觀眾一定可過足癮。另外，舒淇演出唔錯，以前睇慣佢演商業片，並唔覺得特別突出，但係今次純演技演出，可謂一個突破。
《救命》就由李心潔同林嘉欣擔正，故事圍繞兩女發生。喺一個盛大嘅婚禮上，發生了一宗神秘兇案，而警方亦全無頭緒，而案中唯一嘅目擊證人就只有伴娘子清（李心潔飾）。子清於警署內，即時從閉路電視上認出疑兇孫玲（林嘉欣飾）。而經過認人手續時，子清竟知道孫玲呢位素未謀面嘅女人，竟與男友有不尋常關係；同時她一直被腎病困擾，近期更開始失控擴散。兩女生活背景唔同，不過又各自有某些重叠，最後結果的確幾出人意表。
《救命》未上畫前，曾睇過Trailer覺得好正，有啲《異度空間》加《見鬼》Feel，不過最後評語就只係一般，以故事來講，劇情只係普通，甚至覺得有啲牽強，氣氛亦不及《見鬼2》，反而劇中演員都有不俗演出，兩大女角李心潔同林嘉欣，演繹當中心理變化尤其出色。另外男主角許志安演出有進步，不過劇中似乎就未有太多發揮空間，而男配角黃浩賢出鏡較少，不過最令人印象深刻。
