萬二點終於守唔住，恒指大跌227點，跌幅1.9%；國企指數更弱，最多曾散4.8%，尾段反彈，收報3919，仍跌115點，跌幅2.9%。唔使講都知，指數Put輪威晒。
中企指數Put輪9369成為輪王，由4.5仙飛上7.1仙，大升58%；另1件中企Put輪9411跳高21%，收21仙。噚日講過，呢兩件末日輪都係下周四最後買賣，時日無多，玩呢類輪，食得鹹魚抵得渴，千祈咪贏就哈哈笑，輸就呱呱叫。最實際嗰件9655，升12%，收報24.1仙，回報係低啲，風險亦細好多。
國企指數睇嚟重有得跌，但短線超賣，隨時會有反彈，手上仍有中企Put輪者，下周一若見國企先插落去，可先食胡，吼低買番。
國指喺5月中有個上升裂口（3688-3785），下周一若見國指先跌落裂口區，有冒險精神者，可買中企Call輪即市快炒，博裂口區有支持，但切記咪戀戰，輸贏都要速速計數。
可以1博嘅中企Call輪有兩件，9948現價9.5仙，10月28日屆滿，溢價15.9%，槓桿率11.5倍；另1件係9951，現價7.3仙，同日到期，溢價22.6%，槓桿率19.2倍。
呢兩件中企Call輪，數據唔講得靚，但話明即日快炒，數據大可暫時放埋一邊。快炒最緊要交投旺轉身快，9948昨日逾2.8億份易手，9951冇咁旺，亦有71球買賣。
章盛