無綫近日將八十年代嘅《十大勁歌金曲頒獎典禮》製成VCD發售，樂迷反應好好，不過就引起多間唱片公司不滿，指無綫咁樣做唔只搶飯食，重涉嫌侵犯歌手聲音版權，聯手向IFPI（國際唱片業協會）投訴，更不排除會採取法律行動。
演藝人協會主席曾志偉同理事張學友，前晚去咗九龍塘主持演藝人協會例會，志偉同記者講話：「IFPI係透過學友知會演藝人協會，𠵱家交咗畀法律顧問，冇正確答覆，遲啲有先同你哋講。」
對於立法會九九年動議反壟斷條例，有唔少歌手認為同電視台簽約嘅內容，應該冇禁止亮相其他電視台嘅條例，學友都好贊成，佢話：「我個人嚟講，希望可以做得到。」問到佢會唔會團結其他歌手去爭取，學友又話：「我會以幫到演藝人嘅利益做前提，如果可以幫到演藝人，就會撥入議程開會時再傾。」黃秋生之前狠批演藝人協會幫唔到藝人，學友話：「我唔清楚成件事，我相信秋生都係關心個會，都係一件好事。」
此外，志偉將演出電視劇《愛與夢飛翔》，該劇發行嘅收益會捐畀柯受良教育基金，志偉只係象徵式收利是做片酬，但佢都打算拎番啲錢請劇組食飯。
鄭秀文（Sammi）喺下月底開演唱會，最近佢密密咁宣傳，重同無綫拍咗個特輯，Sammi話會親自邀請一啲知己好友喺佢嘅特輯度幫手，好似劉德華、言承旭同杜琪峰等。不過名單中竟然冇許志安，原來分咗手，真係連朋友都做唔到。
由楊受成投資嘅唱片公司MusicIcon，隨住負責人黃劍濤喺本月底離任，由前東魅高層趙潤勤入主後，MusicIcon將會同母公司英皇娛樂合併，旗下歌手趙頌茹、李逸朗就會交由霍紋希接管，黃耀明就重爭兩張碟至約滿，至於林子祥就因為只簽一張唱片約，佢啱啱出完新碟，所以同唱片公司嘅合作亦都結束。
近日有網友質疑台灣名模林志玲喺加拿大多倫多個學位係假嘅，噚日林志玲抽空返屋企攞齊學歷證明，出席噚晚喺誠品書店嘅讀書會，本來大會係要佢推薦好書，但係就變咗澄清學歷，林志玲嘅媽咪亦因為呢個傳聞好勞氣，佢話估唔到個女要面對咁多嘢，重話屋企唔需要個女出嚟搵錢，女兒隨時可退出。
