趙飛雲真係烏鴉口，噚日港股真係出現單邊市大跌，最多曾跌過300點，最後仍跌227點，收11855。
港股噚日大跌嘅理由，其實都係內地加息等舊調重彈，全無新意，大戶要質落，求其搵幾個似是而非嘅理由郁手，總好過出師無名。
有個老友向趙飛雲投訴，話大戶家陣愈玩愈茅，經常將期指監粗質上質落，影響現貨市場，令人輸得唔順氣。趙飛雲亦有同感，但股市向來是弱肉強食，強者生存嘅地方，要參與呢個遊戲，先要明白呢點。
今個星期恒指大跌541點，跌幅4.4%。恒指周線陰陽燭出現「穿頭破腳」的大陰燭，連50周線支持位亦一舉插穿，技術形態利淡。
若由恒指周線保歷加通道分析，恒指5月第1個星期以陰燭插穿保歷加通道底，但第2周以錘頭反彈，返回保歷加通道底之內，之後展開反彈，上周升近中軸（20周線，現處12613）受阻，並以穿頭破腳的大陰燭回落，未來一兩周，恒指反覆下試保歷加通道底（現處11146）的機會相當大。
日線圖情況稍好，昨日急跌後技術超賣，短期或先有反彈，首個阻力區是50日線12040至10日線12077範圍，升近不破是買恒指Put輪的較佳時機，可考慮9975，昨收0.186元，升17%。
興業（480）昨日尾市反彈，收2.225元，跌幅收窄至2.2%，日線圖出現釘頭，利好反彈。但由於未能重返20日線之上收市，按原定計劃沽出止蝕。
趙飛雲