自從去年九月邀請發展商入發展建議書，即惹起官商爭拗、業界抨擊嘅西九龍文娛藝術區，今日中午截收建議書，蘭西喺官方網頁，先至睇到入建議書嘅地點，原來係灣仔政府大樓。
不少業界對文娛區設計藍本、以至發展模式都曾猛烈炮轟，但政府唔肯改，所以香港有財力物力入建議書嘅發展商寥寥可數，嚟嚟去去都係新地、長實、恒基、太古同信和等，蘭西睇網站話恒地會入標；另恒隆一早就講明唔玩。聽講地鐵都唔會入標。
當然，究竟有冇或有幾多跨國大財團願意冒風險，今日就會知道。不過，睇番政府自己嘅評估，就好似唔係咁樂觀。政府為呢個項目成立咗一個跨部門小組，集合成百人去睇發展商建議書，皆因政府弱勢，有乜差池都會俾人罵到飛起。
樓市轉靜，但內地客仍然勇進，成為近期市場焦點，繼日前有內地投資者，斥三千萬元購中半山雅賓利後，再有內地客買跑馬地御駿居。
中原營業董事蔡佩芳話，頂層複式，二六五八呎，以一六五零萬售出，呎價六二○八。一月沽出的頂層B室示範單位，二八二九呎，連二百萬裝修，成交價千八萬。買家係內地客，首次在港投資物業，除上述單位外，正洽商數個分層單位。個客睇樓至落實成交僅兩周，都算爽快。據了解，原因係覺得同區供應少，呎價比起禮頓山平一半。
御駿居為單幢豪宅，共八個單位，率先賣出的是兩個頂層複式。尚餘六伙，因該內地客仍在洽商，暫未有加價計劃。
亞洲地產噚日喺北角半山開第三間分行，多間細行老闆親自到賀，又請到多個商會會長，如中華廠商會副會長兼全國政協委員盧文端、東區工商業聯會會長黃梓欽等做剪綵嘉賓。
重有唔少老牌投資者，包括近排非常高調嘅黎汝遠、炒北角城市花園同和富中心炒到出晒名嘅吳文浩同姚加環，即使人唔到，都派太太出席嘅倫志炎，同埋一早送上花籃嘅陳清白。個別投資者更加一家大細拉大隊撐場，場面墟冚又熱鬧，排場同氣氛，絕對唔比分行吓吓過百間嘅大行遜色。
兩次賣地後，樓市未因好消息而造好，造價曾回升至百萬元以上嘅沙田第一城，不敵市況，百萬大關再度失守，並且一浪低於一浪。
中原分區經理陳世民話，四十五座低層H，四一○方呎，業主四月放盤叫價一百二十五萬，未見承接，兩度減價至一百萬，最終只能以九十二萬八成交，呎價二二六三元，造價較本月初的二四○五元還要低，創近五個月新低。
蘭西
電郵地址：
