遠東生物制藥（399）股價笨豬跳事件，肯定再嚴重打擊投資者對民營企業務的信心，如果唔係嘅話，噚日浙江玻璃（739）又點會一度被質落七成，低見0.55元？
事件反映投資者已變成驚弓之鳥，好彩仍有醒目仔肯周圍問，知道公司冇事發生，股價先至成功抽番上1.55元，但仍然跌14.4%
經紀黃話，雖然浙玻強調公司運作正常，但傳統智慧教落，股價經過重大創傷嘅股份，基本上要守好耐先至有機會復原，尤其係有投機者成功在低位買貨博反彈，肯定會在高位沽貨鬆人，所以短期內浙玻股價仍然會波動，不宜胡亂沾手。
市況突然變淡，原本計劃開車嘅股份，好多都停晒手要睇定先。經紀陳先排講過，華豐紡織（364）中期業績見得人。噚日公布截至今年3月底中期業績，果真見得人，盈利有5061.6萬元，比起去年同期升11%，兼有中期息1.6仙。
但隻股噚日一樣被人質，最低見過0.75元，收市先至升番上去0.80元，冇起跌，成交股數537萬股，金額414萬元。
慕容小初