與電腦J食飯，著名酒家內女士數目佔壓倒性優勢，男士加埋唔夠一打。兩張大圓枱皆為女士所佔，高談闊論嘈到有如十個墟。電腦J嘆話：「現在係女人世界，女士消費力高，因為佢哋容易啲得到高薪厚職，男仔競爭力愈來愈曳。」呢一點左丁山早已注意到，某次到「賀菊」食午飯，店內又係女士數目佔多數。「賀菊」以前叫做Benkay，係置地廣場嘅老牌高價日本菜餐廳，女士到此食飯，當然係收入好，唔會肉赤之類。
香港女仔特別叻，十零年後，中環肯定係女人世界，會計師、銀行家、律師都係女人天下。電腦J一位老友在銀行工作，管股票部門，呢位老友講：「男仔真係冇乜紀律，打機啦、賭波啦、追女仔啦、蒲吧啦，經常玩到癲，返工就死蛇爛鱔，相比起嚟，啲女職員守規矩好多，值得信賴多啲，我係男人，都情願提拔啲女職員。譬如𠵱家打緊歐洲盃，星期一幾乎冇男仔準時返工，返到嚟就滿臉倦容，一睇而知就係睇英格蘭對法國，通頂冇瞓過。」
睇波冇話唔得，但因睇波而影響工作，就會被上司扣分，升級機會打折扣。會計M盡咗生育責任，老婆生咗兩個仔，分別係五歲、八歲，阿爺阿嫲好高興，但會計M見到會計師樓內，新職員幾乎全部係女性，就替兩個仔擔心前途，問左丁山：「點樣教仔先至會唔好輸蝕畀女仔呢？」左丁山是過來人，教佢第一課，就係佢哋讀小學時，盡量限制打機時間，誘導佢哋睇書。