民建聯前主席曾鈺成係有性格之人，對選民態度好啲，對待八方嘅行家就一般。噚日廣大市民終於有機會體會到佢幾咁有性格，事緣佢位繼任人馬力忽然上京為因人大釋法被剝奪子女居港權嘅人士奔波，曾鈺成就喺商台《風波裡的茶杯》解話，點知一開聲就有多位爭取居港權人士家長打電話去同佢對質，話民建聯幫唔到手，又批評民建聯既知今日、何必當初支持釋法？雙方你一言我一語火藥味漸濃。
大家愈拗愈激，主持人都加埋把嘴，阿曾開始發火批評《風波》專倒民建聯，舊年區選前日日鬧足三粒鐘，主持林旭華則反駁鬧阿曾「冇智慧、冇常識、講大話」……之際，阿曾竟突然cut線。
唔少聽眾紛紛致電指曾前主席無風度，cut線呢種係好無禮貌嘅行為，無耐阿曾再打電話去電台，聲稱只係要趕住開會而唔係cut線，重道歉。
除咗喺電台節目鬧出風波，阿曾近日又向學者同專業人士開火，發表文章指佢哋發表嗰份香港核心價值宣言背後有政治動機，美化殖民地管治，實情係一篇「聲討特區政府和中央政府的檄文」，呢種說法，都堪稱上綱上線嘅典範，阿曾莫非想屈班手冇寸鐵嘅書生造反？真係好有文革味道。
阿曾老師吳康民叫大家講和，同民主派多啲溝通，阿曾就一於當聽唔到，如此脫離群眾，亂扣人帽子，唔怪得何秀蘭夠膽空降去九西，同佢撼過。
（圖）曾鈺成突然cut線，之後又否認又道歉。
傳真︰2623-9278
電郵︰