最近民主派搞立法會選舉協調，風起雲湧，雖然最新安排係梁家傑話過九龍東又唔走，留喺港島，但成件事未成定局，重有條尾巴。有民主派人士最近同八方講，喺立法會有「壞孩子」之稱嘅獨立民主派陳偉業，眼見大狀嘅空降傳聞，唔知點解好唔忿，前兩日突然打電話畀余若薇，猛鬧佢哋咁做好唔啱。
其他民主派人士聽到都好奇怪，其實班大狀自己係想一動不如一靜，轉區只係被人游說要「顧全大局」，況且梁家傑又冇打算去陳偉業嘅選區新界西。
八方心諗，唔通陳偉業喺新界西無風無雨、安樂得滯，想邀請班大狀過新西參選熱鬧一番？
諗諗吓又有數為，新界西位最多，有八席，橫掂何秀蘭過九龍東都引起部份民主派不滿，不如搵余若薇或者梁家傑過新界西，更加海闊天空啦。
傳真︰2623-9278
電郵︰