密室嚇鬼愈玩驚

好多機迷投訴，話《生化危機》愈玩愈走樣，似槍Game多過恐怖Game，驚嚇感不復當年。若然Enjoy被嚇感覺，剛推出嘅《SilentHill4：TheRoom》肯定啱晒你，因為新一集繼續大賣黑暗無助感之餘，重新增至20款騎呢魔物嚇鬼你，滿室血花場景更比比皆是，真係細膽啲都玩唔起。
記者：徐影龍

氣氛營造一向係《SilentHill》嘅強項，由人物到配樂，都控制得十分好，尤其今次第四集，以一個地方為一個章節的區分，如荒廢地鐵站、寂靜山丘、圓筒形監房等主景，都設計得好有心思，滿地血花銹迹，重要揸住碌棍對付各式騎呢敵人，嗰種成個地球得番我一個嘅孤獨無助感，大大提升遊戲嘅驚慄性，筆者起初喺夜晚熄燈玩，撞正有鬼叫聲，真係有股寒意由背脊升上嚟，諗起都重有啲驚，自問大膽者不妨一試。

■雖然個公仔唔識郁，不過都嚇你一驚。

■後期主角屋企變成「異世界」，周圍血迹相當恐怖。

■屋企大門布滿鎖鏈，出入都唔得。

■望窿係新元素，由防盜眼、牆窿到監視窗，都增添不少懸疑性。

唔知因乜自困302室
遊戲系統改變不少，首先係可自由穿梭「異世界」，目的係解開自困302室之謎，由正常世界（302室）嘅廁所大窿出入，每完成一個地方就可向下一目標進發。由於今集嘅「異世界」唔再有SavePoint出現，加上攜帶道具如《生化危機》咁有上限，所以往返302室進行Save及存取道具變得相當重要及頻密。
多啲返屋企另一好處，就係可以慢慢回復體力，加上大部份敵人被殺後唔識復活，喺「異世界」同敵人廝殺一輪後，大可返歸「回氣」再嚟過，故此毋須一條氣咁打落去，對動作Game初哥嚟講會易玩好多。

■槍擊類武器冇《生化危機》咁多姿多采，通常揸住碌棍殺敵。

■拎唔晒嘅道具可暫存家中儲物箱，比起《生化危機》次元空間箱合理得多。

解謎難度升級
雖然動作部份易咗，不過謎題就深咗好多，每一個地方都需花一輪時間去破解，如地鐵站諗計入閘、拎住個鏟喺森林搵手形樹根、轉動整層的圓筒形監房為求日光射進屋，真係愈玩就愈難，的確需要冷靜同縝密嘅心思找出玄機。幸好今集仍設有英、日介面及字幕，兼且玩緊都可轉語言，筆者就係不停咁對照英文及漢字，了解各種Memo提示及道具用途，順利破解唔少深奧嘅謎題，過關遇樽頸位者千祈唔好咁易放棄。

■鄰居Irene，於「異世界」醫院正式登場，中期出現協助主角殺敵。

■懷疑主角係死神，去到每一個新地方，都有一個人被謀殺。

■成間房都係血同喇叭，都幾變態。

初回版送鬼古CD
初回版附有一隻名為《響談》嘅3"CD，成隻碟得一條16分鐘嘅Track，以一輪佛教音樂為起首，急轉直下配以美妙嘅琴聲，相當之古怪，更無厘頭係日本國寶級講古佬一龍齋貞水無啦啦走出嚟，依依哦哦起勢講鬼古，聽到筆者一嚿雲，幸好結尾嗰5分鐘播番Opening首超正主題曲，平衡吓心理。

50張雙面嚇鬼海報等你攞
今次香港KONAMI十分重視呢隻《SH：TheRoom》，印製大批精美雙面海報作宣傳之用，兩面嘅影像都咁恐怖，據Game舖回報，試過有細路仔行過嚇親㖭！咁搞鬼嘅海報，又點少得《蘋果》讀者嗰份呢？只要手持今日本版報道，到DreamStore就可免費攞到，先到先得，送完即止。

換領點：DreamStore
地址：灣仔東方188商場256號舖（25753285）

遊戲類型：動作＋解謎
對應機種：PS2
遊玩人數：1人
行貨售價：$428
總代理：龍勇
開發商：KONAMI

(C)19992004KonamiComputerEntetainmentTokyo